CEBU, Philippines - Daan nang napanglantawan nilang Venancio Cabillon, nailang Frater Paul Mary ug ni Dr. Edwin Fonghe nga mo-inhibit sa kasong libelo batok ni Arsobispo Ricardo Cardinal Vidal si Assistant City Prosecutor Luis Calderon.
Sa pakighinabi sa Banat News, si Fonghe mipadayag nga dili ikahibulong nga mo-inhibit gyud ang usa ka piskal nga modala sa maong kaso gumikan sa ka-impluwensiyado ni Cardinal Vidal.
Matud niya nga misabot sila ni Calderon ug ila kining gitahod kay sa mahimo siyang bias sa paghupot niini pabor kang Cardinal Vidal.
Susama gihapon ang ilang panglantaw ni Cabillon ug Dr. Fonghe sa mga piskal nga mopuli sa pagdumala sa maong kaso, ilabi na kun usa kini ka Katoliko Romano.
Matud ni Fonghe nga posible usab nga adunay mga impluwensiyadong mga tawo gikan sa Malacañang nga adunay kalambigitan sa pag-atras ni Calderon sa kaso.
Gipasabot ni Fonghe nga ang kasong gipasaka batok ni Cardinal Vidal wala kini magsentro sa relihiyon kun dili ang iyang tawhanong sayop sa pagtugot nga mapublikar sa Bag-ong Lungsuranon ang pagdaot sa dungog ni Cabillon isip kanhi sakop sa Marian Monks of Eucharistic Adoration sa Lindogon, Sibonga.
Gipadayag sa doktor ug ni Cabillon nga abli pa gihapon ang ilang kaugalingon sa pagsulbad niining maong isyu, apan sa gihapon buot sa duha nga si Cardinal Vidal mismo ang mopadangat sa iyang kaugalingon ngadto ni Cabillon ug mangayo og pasaylo sa ilang gihimong pagdaot sa kadungganan niini.
Matud pa ni Fonghe nga "Nobody is above the Law sa mata sa Diyos ug sa tawo." – BANAT NEWS