CEBU, Philippines - Patay ang usa ka lalaki human dunggaba sa tawong iyang gipuspusan og botelya sa ulo niadtong milabay’ng adlaw’ng Domingo sa Zone Sibuyas, sa barangay Umapad, dakbayan sa Mandaue.
Ang namatay mao si Abundio Dapdap, residente sa maong dapit samtang giila ang midunggab kaniya mao si Jaime dela Cruz, silingan sa biktima sa maong dapit.
Si SPO1 Reynaldo Urot sa Presinto 5 sa Opao Police Station nga nahinabi sa Banat News miingon nga sa ilang imbestigasyon ilang nasuta nga ang duha nagkabayloay og init nga mga pulong atol sa ilang panaglalis.
Ang biktima nga napungot daling misukmag sa suspek ug wala pa gyud matagbaw mipunit og botelya dayong hapos niini diha sa ulo ni dela Cruz nga miresulta sa pagkabuak sa botelya diha sa ulo sa naulahi.
Matud pa ni SPO1 Urot nga bisan nagsusapinday na si Dela Cruz nakapunit kini og kutsilyo ug giduslak ang buko-buko ni Dapdap tulo ka higayon.
Nadakpan ra ang suspetsado sa follow-up sa kapolisan ug kasong murder ang gikatakdang ipasaka batok niini. (Romeo Limpangog) (BANATNEWS)