CEBU, Philippines - Posible gihapon nga makakuha og endorsement gikan sa kagamhanan sa dakbayan sa Sugbu ang planong pagtukod og Light Rail Transit (LRT) dinhi sa Metro Cebu kung ang mga nag-proponer niini makapasabot og husto ngadto kang Mayor Tomas Osmeña nga misaway sa nahisgutang proposal.
Giangkon ni Osmeña nga naglabad ang iyang ulo nga naghuna-huna atol sa pag-presentar sa proyekto niadtong miaging adlaw hinungdan nga siya nasuko.
Ang mayor mihingalan og lousy urban planner sa Department of Transportation and Communication (DOTC) tungod kay kini wala makakumbinser kaniya. “Naglingkod lang ko didto og usa ka oras naglabad na akong ulo nga naghuna-huna nga mag-agwanta gyud mong tanan, ang mga Sugbuanon gyud ang mobayad og 30 bilyones pesos, I’m not convinced the way they were presenting it,” sumala ni Osmeña. Apan gitataw sa mayor nga wala pa niya hingpit sirad-i ang posibilidad nga mosuporta sa nahisgutang proyekto kun kini makahatag og kaayuhan lakip na sa mga kabus. Subay niini, si DOTC Undersecratary for Railways nga si Guiling Mamondiong andam makigtagbo kang Osmeña ug mopasabot niini.
Gani si Mamondiong mihangyo kang City Planning and Development Officer Nigel Paul Villarete nga tabangan siya pagpakigkita sa mayor.
Gitataw sa DOTC undersecretary nga gikinahanglan ang endorsement sa city government sa maong proyekto tungod kay 95% sa kliyente niini giingong ania sa siyudad. Apan human masayod sa plano ni Mamondiong gipabuhagay ni Osmeña ang iyang kadismaya ngadto sa DOTC labot sa pagplano sa nahisgutang proyekto.
“Unya maminaw pud siya nako, o ako ray maminaw niya, sa panahon nga ilang gibuhat ang plano, nag-consult sila sa siyudad? Karon, mohatag siya og explanation? Ang iyang gusto one way, ako ra ang maminaw unya siya dili, hello?” matud pa ni Osmeña.
Una nang gipadayag sa mayor nga siya mas pabor nga ang Bus Rapid Transit (BRT) maoy ipatuman nga mas transport system sa dakbayan tungod kay kini sayon rang ipatuman ug mas minos usab ang gasto sa pag-operate niini. Ang BRT susama gihapon og konsepto sa train apan mogamit lang og walay hagdanan nga bus ug makabiyahe sa bisan asa nga dapit kung dunay station.
Gitataw hinuon ni Mamondiong nga ang giproponer nga BRT ug LRT project dili kakompetensya ug mahimo hinuong magsuportaay sa usa'g-usa. Sa nangaging pagpakighinabi sa Banat News sa mayor giklaro hinuon niini nga siya dili makababag og proyekto nga ipatuman sa nasudnong kagamhanan. Si Kongresista Eduardo Gullas sa unang distrito sa probinsya sa Sugbo maoy mipalabang og balaodnon alang sa nahisgutang multi-billion peso nga LRT project. – BANAT NEWS