CEBU, Philippines - Andam atubangon sa Arsobispo Ricardo Cardinal Vidal ang kasong libelong gipasaka kaniya ug sa tulo pa ka mga pari sa kanhi monghe sa Marian monks sa Lindogon, Sibonga sa Provincial prosecutors office sa miaging adlaw.
Gibutyag ni Msgr. Esteban Binghay ang Episcopal Vicar sa dihang nahinabi sa Banat News nga daan nang nagtuo ang Cardinal nga mopasaka gyud og kaso ang gipalagpot nga monghe nga si Venancio Cabillon.
Kini dihang nagdumili kini pagpakig-estorya sa dihang gipatawag unta sa Cardinal aron mapaminaw ang iyang reklamo ug kaaksyonan apan miawhag hinuon sa Cardinal nga kini papangayuon og pasaylo atubangan sa ilang abogado ug mga sakop sa media.
Si Cabillon mipasaka og kasong libelo batok sa Cardinal tungod sa pagpirma niini sa kamanduan nga nagtaktak kang Cabillon pagkasakop sa Marian monks nga gipatik usab sa Bag-ong Lungsoranon niadtong petsa 9 sa milabay'ng bulan sa Agosto.
Gikasakit ni Cabillon ang pagpublikar niini sanglit gitan-aw niyang dili makiangayon ang gihimo sa Simbahan kaniya ug pagpasangil nga usa siya ka trafficker, nakalapas sa Chastity sa usa ka monghe ug uban pa.
Si Cabillon maoy boluntaryong mipahawa sa ilang grupo niadtong Enero 8 tungod sa mga pasangil nga di na niya maagwanta ang mga malaw-ay'ng gipanghimo sa mga kaubang monghe.
Samtang ang tigpamaba sa Archdiocese sa Sugbo Monsenyor Achilles Dakay daling mipasabot nga ang pagpirma ni Vidal nagpasabot lang kadto sa pag-uyon niini sa rekomendasyon nga taktakon si Cabillon pagkasakop sa maong pundok.
Wala magtuo ang cardinal nga ipublikar diay kini sa maong pamantalaan ug labaw nang walay intensiyon ang Cardinal nga pakauwawan si Cabillon.
Apan bisan pa niini, matud pa ni monsenyor Binghay nagpadayun usab ang imbestigasyon sa simbahan batok sa mga alegasyon ni Cabillon sa pagkataktak niini pagkamonghe ug masaligon silang dili kini maapektahan bisan pa sa gisang-at nga kasong libelo sa piskaliya.
Apil sa gipasakaan og kaso ni Cabillon ang superior nga si Frater Martin Mary, Rev. Fr. Marnel Mejia ug Msgr. Cristobal Garcia may kalambigitan sa pagpublikar sa pagkataktak ni Cabillon. – BANAT NEWS