CEBU, Philippines - Usa ka lalaking wala hiilhi kansang lawas nabulit sa tinigbasan ug dinunggaban, napalgang wala nay kinabuhi didto sa dapit sa tulay sa barangay Dumlog, dakbayan sa Talisay, atol sa piyesta sa maong dakbayan kagahapon sa kaadlawon.
Matud pa nila ni PO3 Arnold Damasco ug PO2 Erwin Carbonquillo uban sa mga polis nga ubos sa Field Training Program (FTP) kinsa maoy misil-ing sa maong patay, nga ang ulo ug lawas niini maoy gisantako sa mga tigbas nga agi sa pinuti ug mga linubaan sa lawas nga naglunang na sa iyang dugo
Gihulagway nila kini nga kasarangan ra ang gidak-on, may gitas-ong 5’4, gibana-banang 30-35-anyos ang pangidaron, may patik sa walang bukton nga ulo sa kalabera nga dunay markang “RACIOL” samtang ang tuong bukton niini adunay patik nga mga letra sa Chinese. Ang biktima nagsul-ob og itom nga t-shirt ug checkered nga short pants.
Ang patay’ng lawas anaa na karon sa Saint Francis Funeral Homes sa barangay Bulacao, Talisay. Ang kapolisan sa pagsuwat ning balita ang wala pay nahipos nga mga kasayoran bahin sa ngalan sa biktima ug kinsay mipatay niini.
Sa laing bahin, gawas sa maong insidente, sukad kagahapon sa buntag hangtud sa udto walay mga natalang mga negatibong hitabo o kagubot atol sa pagsaulog sa piyesta sa maong dakbayan.
Gipakatap sa maong lugar ang mga kapolisan nga maoy nagmintenar sa kalinaw ug kahusay sa tibuok dakbayan. - Brenda D. Batuto (BANAT NEWS)