CEBU, Philippines - Patay ang usa ka 70-anyos nga ugangan human kini dunggaba sa umagad nga lalaki sa miaging adlaw sa Poblacion, dakbayan sa Danao.
Ang namatay mao si Victoriano Hermoso ug ang suspetsado nga umagad niini giila nga mao si Mario Barbero, hingkod ang panuigon ug pulos nagpuyo sa maong dapit.
Si SPO4 Teofilo Deguilmo sa Danao Police Station nga nahinabi sa Banat News miingon nga diha sa ilang panimalay ang biktima dihang kalit gidunggab og kutsilyo sa umagad niini sa dughan ug uban pang bahin sa iyang kalawasan.
Dali kining gidala sa iyang mga kabanay sa Danao District Hospital apan namatay kini paglabay sa pipila ka mga oras.
Si SP04 Deguilmo miingon nga sa ilang pakisusi nga gihimo ilang nasayran nga ang panagbangi sa biktima ug suspetsado nga naglambigit sa suliran sa ilang pamilya maoy nag-unang hinungdan sa maong pagpanunggab niini.
Matud pa ni Deguilmo nga ang suspetsado kinsa daling nakasibat pahilayo sa maong dapit ug padayon pang gipangita kinsa nagpabilin pang gawasnon hangtod niining panahona. - Romeo T. Limpangog ug Darrel Carumba (BANAT NEWS)