CEBU, Philippines - Nasurpresa si Thelma Chiong sa paglarga ni Paco Larañaga nga usa sa mga gikonbikto sa korte tungod sa paglugos ug pagpatay sa duha niya ka anak, paingon sa nasud sa Espanya aron adto kini bilanggoon.
Si Chiong nga nahinabi sa GMA-7 kagahapon nagkanayon nga nahingangha na lang siya sa report nga iya nga nadawat samtang didto siya sa Leyte nga si Larañaga nakasakay na paingon sa Espanya kagahapon sa alas 5 sa kaadlawon.
Matud pa ni Chiong nga wala gani siya pahibaw-a asa nga lugar sa Espanya dad-on ug bilanggoon si Larañaga.
Gimahay niya si Foreign Affairs Sec. Alberto Romulo nganong wala siya pahibaw-a sa paglarga ni Larañaga tungod kay ang DFA man ang masayod sa paglarga niini nunot sa nagpabilin nga “hold departure order” batok sa konbiktado.
Giasoy niya nga bag-ohay pa silang nagka-estorya ni Justice Secretary Agnes Divenadera kabahin sa pagbalhin ni Larañaga og bilanggoan ngadto sa Espanya.
Gitataw niya nga wala gyud siya masayod sa lugar asa bilanggoa si Larañaga ug naglibog siya unsaon niya pagduaw kini.
Dugang pa niya nga andam niyang duawon si Larañaga didto sa Espanya bisan og makautang siya og i-plete.
Si Larañaga nakapapahimulos sa kasabutan nga gipirmahan sa Pilipinas ug Espanya nga magbaylo og mga piniriso.
Usa siya sa pito ka gipasanginlang milugos ug mipatay nilang Marijoy ug Jacqueline Chiong dugay nang katuigan ang nakalabay ug gikonbikto sa korte. (BANATNEWS)