CEBU, Philippines - Nagpatabang sa buhatan sa Visayas Ombudsman ang usa ka testigo sa kasong pagsulay sa pagpusil patay sa usa ka biktima sa barangay Pardo ning siyudad sa Sugbu niadtong Enero 11 ning tuiga nga ang gitumbok nga suspek usa ka polis.
Ang mireklamo mao si Sinon Tabura batok sa gireklamong polis sa Pardo Police Station nga si SPO4 Sanrico Jolejole niadtong pasado alas 12 ang takna sa tungang gabii sa Septiyembre 16, 2009. Ang reklamante nga si Tabura giubanan sa iyang inahan nga si Laureana Tabura sa pagsumbong sa Ombudsman batok kang Jolejole ug sa iyang gitumbok nga mga asset nga barangay tanod sa barangay Pardo ning siyudad sa Sugbu.
Sumala pa sa reklamante nga si SPO4 Jolejole ug Jimmy Tabura nga armado og armas niadto sa balay sa testigos, nanuktok ug nangita kaniya (Tabura), apan sa kahadlok wala nila kini ablihi.
“Natahap ko nga ang pag-adto nilang SPO4 Sanrico Jolejole sa among balay niadtong Septiyembre 16 dunay kalambigitan sa kaso ni SPO4 Jolejole," ang inahan sa testigos nga si Laureana Tabura miingon.
Si Sinon Tabura mao man ang usa sa testigos sa pagsulay sa pagpusil patay kang Reynaldo Sabellano niadtong Enero 11, 2009, si Sabellano gihulagway nga nalambigit sa mga pagpanglabni ug tulis sa hurisdiksyon sa Pardo.
Samtang sa interview sa DyRF sa amahan ni Reynaldo Sabellano nga si Ronie Sabellano, kini mibutyag nga mipa-blotter sa barangay Pardo ang iyang anak niadtong Septiyembre 21 tungod sa ilegal nga pag-rekisa ni Jolejole sa iyang anak.
Matud pa niini nagtabi ang iyang anak ug mga higala daplin sa dalan ug dihang naagian sa maong polis luwan sa patrol car kalit niya kining gihunongan ug girekisa ang iyang anak ug gimandoan pa kining pasakyon sa patrol car apan miabot ang iyang asawa ug gibabagan si Jolejole. Ang Banat News makadaghang higayon nang misuway pagkuha sa habig sa maong polis ug sama sa nanglabay'ng higayon wala gyud makahinabi ning tigbalita ang gipasanginlang polis sa rason nga atua pa kini sa gawas sa gidestinohang beat patrol. (CA) (BANATNEWS)