CEBU, Philippines - Usa ka dalagang estudyante kinsa naguol kay wala na balika sa uyab misuway unta sa paghikog pinaagi sa paglayat sa Mactan Mandaue bridge sa miaging gabii.
Matud pa sa kapolisan nga kun wala pa kapugngi sa iyang kauban, hayan nga si Jively Anticristo, 20, dalaga nga taga B. Aranas, dakbayan sa Sugbo, molampos gyud sa iyang pagpakamatay.
Si PO3 Manolito Labus sa Opao Police Station miingon nga si Anticristo, usa ka HRM student sa University of Cebu Lapulapu and Mandaue (UCLM) sa barangay Looc, dakbayan sa Mandaue.
Sumala kang Almira Amoin, 18 , dalaga nga taga dalan Lorega, dakbayan sa Sugbo, tinun-an usab sa UCLM nga gipakuyog siya ni Anticristo sa pag-adto sa barangay Looc, dakbayan sa Lapulapu kay moduaw sa higala niini.
Dugang pa ni Amoin nga nagsakay sila og taxi paingon sa Lapulapu apan sa pag-abot nila sa tiilan sa First Mactan Mandaue Bridge sa habig sa barangay Looc, sa dakbayan sa Mandaue nanganaog sila sa taxi ug naglakaw na lang sila paingon sa balay sa higala ni Anticristo.
Apan matud pa ni Amoin nga misirit lang si Anticristo og lakaw nga sagol dagan ug pag-abot niini sa tunga-tunga sa taytayan nanugon kini nga pahibaw-on lang ang iyang mga ginikanan kun unsay iyang dangatan. Unya midangoyngoy kini ug kalit nga mipatong sa brandilya sa taytayan kay gusto nang mo-dive ngadto sa tubig apan gigamit ni Amoin ang iyang abilidad sa pagkupot niini uban sa pagpangayo og panabang sa mga drayber nga milabay sa maong lugar.
Dugang pa ni PO3 Labus nga dili pa makasulti ang biktima apan ilang gituohan nga ang hinigugma niini maoy hinungdan sanglit sa ilang nasuta nga usa na kapin ka bulan nga wala na mopakita niini. . (BANATNEWS)