CEBU, Philippines - Usa ka giingong ex-convict ang nag-wild ug kalit namusil ug nakapatay og trabahante ang gitabangan usab og patay sa mga estambay diha sa Zone Sunlot, sa barangay Calawisan, dakbayan sa Lapulapu niadtong milabay'ng adlaw.
Ang ex-convict nga nakapusil-patay mao si Danilo Mercadero, 57, nagpuyo sa maong dapit ug ang biktima nga iyang napusilan mao si Renato Delima, 42, nga silingan niini.
Si PO3 Candido Baringue sa homicide section sa kapolisan sa maong dakbayan miingon nga kalit lang mitumaw diha sa dapit ang suspetsado ug nagwara-wara sa gidalang armas nga kalibre .38 ug Batangas knife.
Ang biktima kinsa naglingkod lang sa maong dapit maoy giduol sa suspek ug gipusil sa dughan ug dihang natumba gihansakan kini sa suspek sa gidalang Batangas knife hinungdan sa hinanali niining kamatayon.
Apan sa dayon nang ikyas sa suspek ug sa gimugnang komosyon nakamatikod ang mga estambay kinsa daling mipunit og mga hinagiban ug bato dayon gitabangan og puspos ang suspek hangtud nalup-og.
Samtang nagbuy-od diha sa dalan gikatahong gidakdakan sa mga estambay og mga bato ang ulo niini nga maoy nakaingon sa hinanali usab niining kamatayon.
Dihang miresponde ang mga polis, walay bisan usa sa mga tawo nga ilang naabtan ang mibutyag kun si kinsa ang nagtabang sa pagkulata hangtud namatay si Mercadero.
Si PO3 Baringue miingon nga nagpadayon pa ang ilang imbestigasyon pagsuta sa hinungdan sa kalit nga pag-wild ni Mercadero nga miresulta sa kamatayon sa silingan niini. (BANATNEWS)