CEBU, Philippines - Pabiling blangko ang kapulisan pagtumbok sa mipatay sa usa ka 19 anyos nga lalaki nga naglakaw sa dalan sa Poblacion, lungsod sa Lilo-an, niadtong Domingo sa alas 12:05 sa sayong kaadlawon. Ang biktima nga naigo sa sentro sa ulo mao si Clairson Declaro, 19 , ulitawo, nga taga Sitio Suba, Poblacion sa maong lungsod.
Matud ni PO2 Rutchell Jugalbot sa Lilo-an Police Station nga ang biktima kauban sa tulo niya ka mga barkada gikan nga nanuroy sa Sitio Looc Poblacion og paingon na untang mamauli niadtong higayona.
Apan pag-abot nila sa Poblacion kalit lang gihunongan sa usa ka motorsiklo nga gisakyan sa duha ka wala hiilhing mga tawo ug ang angkas niini maoy mipusil sa bagolbagol sa biktima. Human matumba ang biktima misirit usab dayon pahilayo ang motorsiklong gisakyan sa duha ka kriminal apan walay nakakuha og plate number niini.
Ang biktima gidali unta pagdala ngadto sa Vicente Sotto Memorial Medical Center (VSMMC) apan paglabay sa pipila ka gutlo nabugtoan kini sa kinabuhi. (Darrel A. Carumba) (BANATNEWS)