CEBU, Philippines - Ang mga kabus nga molupyo sa dakbayan sa Lapulapu maoy unang makapahimulos sa gilusad nga socialized housing program ni Mayor Arturo Radaza sa sitio Toril, barangay Canjulao, dakbayan sa Lapulapu sa miaging Domingo.
Si Mayor Radaza kauban sa iyang kapikas, Mrs. Paz Radaza atol sa paglusad sa maong proyekto nagkanayon nga ang 25 ka ektaryas nga luna sa kagamhanan sa maong lugar gideklarar na sa nasudong kagamhanan nga ipapuno sa kabalayan. Gipasabot niya nga mokabat sa 3,000 ka mga kabus nga molupyo sa kabarangayan sa maong dakbayan ang makapahimulos sa maong programa nga gisugdan niya sa pagpatuman sukad niadtong 2004.
Sa maong programa ang mga lumolupyo sa barangay Canjulao maoy nag-una nga makabenepisyo niini.
Si Konsehal Efren Herrera nga sakop sa oposisyon dihang nahinabi sa Banat News mipadayag usab og suporta sa maong programa. Matud pa niya nga ang mga kabus nga molupyo sa dakbayan kinahanglang makabaton og kaugalingong luna ug desenting mga balay alang sa ilang maayong kaugmaon.
Gitataw niya nga iyang gipaluyohan ang mga programa sa mayor sa dakbayan nga iyang nakita nga makaayo sa katawhan.
Gani daghan pang luna sa gobyerno sa Lapulapu nga giibid-ibiran sa mga eskuwater aron nga tarokan og mga barongbarong. Kini tungod sa dakong paglaum nga sa umaabot nga mga adlaw ihatag ra kanila sa gobyerno ang maong mga luna. (Romeo T. Limpangog ug Bong Soriano) (BANATNEWS)