CEBU, Philippines - Gibutyag ni Department of Education (DepEd)-7 regional director Ricaredo Borgonia nga dili tanang publikong tunghaan ang maapektahan dinhi sa rehiyon niining bag-ong resolution ni DepEd Secretary Jesli Lapuz nga menosan ang oras matag adlaw sa klase sa elementarya.
Si Borgonia sa dihang nahinabi sa Banat News kagahapon mipasabot nga kadto rang mga tunghaan nga piot kaayo ug kadtong daghang estudyante ang maapektahan niini, samtang kadtong mga lapad nga classrooms dili maapektahan.
Matud ni Borgonia kun dunay mga lugar nga “oversize” ang lawak saringan sama sa kadaghanan dinhi sa Central Visayas dili mahimong i-apply ang kamanduan ni Lapuz gawas lang sa Cebu City.
Ang kamandoan nag-ingon nga ang grade one ug two himuon nalang og upat ka oras matag adlaw samtang ang grade three upat ka oras ug tunga ang klase ug ang grade 5 ug 6, lima ka oras matag adlaw.
Kagahapon adlawa si Borgonia mipatawag sa tanang school superintendent sa tibuok rehiyon alang sa usa ka executive conference ug usa kini sa ilang gituki.
Samtang si Cebu City Schools Division Superintendent Doctor Lorna Rances mibutyag nga pipila na lang ka publikong mga tunghaan sa siyudad ang giingong nagkuwang og mga lawak-saringan karong tuiga.
Apan pabiling kuwang og lawak-saringan ang Basak Elementary School, Talamban Elementary School, Abellana National School, Vicente Rama Memorial National High School ug ubang dagkong tunghaan sa dakbayan giingong dunay shortage usab sa lawak-saringan. – BANAT NEWS