CEBU, Philippines - Nabuslot ang liog sa usa ka ginang human kini unaya pagpusil sa iyang kaugalingong manghod atol sa ilang init nga panaglalis didto sa sitio Pagatpatan, barangay Bayong, lungsod sa Balamban, niadtong Martes sa alas 2:00 sa hapon.
Ang biktima mao si Geronima Abanto Morong, 46, minyo, samtang ang suspek mao ra usab ang iyang manghod nga si Roger Abanto, hingkod, minyo, ug pulos taga Pagatpatan.
Si PO2 Cesar Climaco sa Balamban Police Station mibutyag sa Banat News nga ang biktima ug suspek nagkalalis bahin sa problemang pinansiyal sa ilang pamilya.
Apan misangko kini sa kainit sa ilang lalis ug dihang nahutdan sa pasensya ang suspek kay wala kuno kaagwanta sa grabeng yawyaw sa biktima milanit kini sa paltik niyang armas ug gipusil ang biktima.
Ang biktima naigo sa tuong bahin sa liog ug milapos ang bala sa luyong bahin niini hinungdan nga gidali dayon kini paghatod sa mga kabanay ug silingan sa Balamban District Hospital apan tungod sa katalandugon sa kahimtang sa biktima, gilahos kini ngadto sa Vicente Sotto Memorial Medical Center (VSMMC) sa siyudad sa Sugbo. – BANAT NEWS