CEBU, Philippines - Subling gipahinumduman ni Acting Mayor Michael Rama ang kapolisan sa dakbayan nga dili molugak sa ilang kampanya batok sa kriminalidad tungod usab sa gipaabot nga pagsaka sa krimen sa nasod lakip na dinhi sa Sugbu mugna usab sa nagkaduol na nga Christmas season.
Matud ni Rama nga kinahanglang ipatuman kanunay sa kapulisan ang police visibility ug tan-awon ang mga crime-prone areas sa dakbayan nga sagad may mahitabong pagpangawat, pagpanglabni ingon man sa pagpanulis.
Gani kagahapong adlawa, sila si Vedasto Corsiga Jr, 25, ug ang manghod niini nga si Herbert, 22, nabiktima sa pagpanulis sa dalan Arlington Pond sa barangay Sta.Cruz ning dakbayan ug gipusil patay si Vedasto sa mga tulisan.
Ang managsuong Corsiga nga lumad nga taga-Tubigon, Bohol ug dinhi sa dakbayan nanarbaho, nakuhaan sa ilang cellphone ug kwarta sa duha ka suspetsado. Matud pa ni Rama nga siya wala magkuwang pagpahinumdom sa kapulisan isip chairman sa Police Coordinating and Advisory Council (PCAC).
Una na hinuong gipasigarbo sa kadagkuan sa kapulisan sa dakbayan nga taas ang pagkunhod sa crime rate sa siyudad sa nangaging mga buwan. – BANAT NEWS