CEBU, Philippines - Duha ka mga konsehal nga sakop sa Bando Osmeña Pundok Kauswagan (BOPK) ang giingong migawas nga nangamote sa gihimong survey nga gimando ni Cebu City Mayor Tomas Osmeña sa iyang mga sakop alang sa pagpangandam sa ilang line up sa umaabot nga 2010 elections.
Sama sa gihapon, ang gisangunan sa mayor nga mo-survey mao ang consultant sa City Hall nga si Dr. Nestor Alonso.
Nagdumili hinuon pagbutyag ang consultant sa resulta sa iyang gipahigayon nga survey, tungod kay kini giingong alang ra sa kasayuran sa BOPK.
Apan kasaligang tinubdan sa Banat News mibutyag nga duha ka konsehal sa siyudad nga mahimo pang magpasubli sa 2010 elections ang taktakunon tungod kay giingong nangamote sa gipahigayong survey ug posibleng dili na makadaog kung himuon karon ang eleksyon.
Wala hinuon gitataw sa tinubdan kung ang duha ka konsehal pulos ba anaa sa amihanan o habagatang distrito sa dakbayan.
Una nang napanglantaw ang lider sa oposisyon sa siyudad nga si Jonathan Guardo nga mas dako ang ilang kahigayunan nga modominar sa 2010 elections tungod kay giingong dili na makapasubli pagpapili sa katungdanan ang mga haligi sa BOPK pinanguluhan ni Osmeña. – BANAT NEWS