CEBU, Philippines - Ang Cebu Provincial Police Office (CPPO) moumol og “Tangke Anti-Illegal Drugs Task Group diha sa dakbayan sa Talisay nga tahasan sa paggukod sa nalambigit sa illegal drugs diha sa barangay Tangke dakbayan sa Talisay.
Kini maoy gibutyag ni Sr. Supt. Jesus Gaquing, director sa kapulisan sa lalawigan sa Sugbu, sa ingon mahatagan na og solusyon ang dugay na kaayong problema sa illegal drugs diha sa Tangke.
Matud pa ni Gaquing, nga duha ka semana gikan karon nga mi-request kaniya si Mayor Socrates Fernandez nga mohulma’g task group ang kapulisan nga ibutang diha sa barangay Tangke.
Sumala pa niini nga ilang pabutangan og dugang mga polis ang nahisutang lugar aron mabantayan ang entrance ingon man exit nga kadalanan sa nahisgutang lugar.
Gipadayag niining nagpaabot nalang siya kang Police Regional Office (PRO-7) Chief Supt. Lani-o Nerez nga mohatag usab og personnel nga maglangkob sa grupo.
Gibutyag niining ang iyang hangyo kang Nerez nga maglangkob sa Task Group mao ang mga bag-ong gradwar sa Regional Mobile Group (RMG-7) ug maoy tahasan sa pagbantay sa lugar sulod sa 24 oras diha sa Tangke.
Gihulagway sa kapulisan nga ‘problematic’ gyud kaayo ang barangay Tangke sa Talisay gumikan kay ang mga molupyo gikatahong molaban pa sa mga drug pusher ug duna nay higayon nga nag-people power ug mamato og mga polis. (BANAT NEWS)