CEBU, Philippines - Duha ka tawo nga wala na makaantos sa problemang ilang gisagubang miunay pagkutlo sa ilang tagsa-tagsa ka kinabuhi pinaagi sa paghikog sa managlahing lugar sa lalawigan sa Sugbo.
Usa ka Emelita Jabara Enticia, 36, giingong taga Mandaue nakit-an na lang sa iyang kapuyo nga naghikog sulod sa ilang panimalay didto sa sitio Tubod, barangay Bitoon, Dumanjug niadtong milabay’ng gabii.
Sa report sa kapolisan sa Dumanjug nga giduso sa Operations Branch sa Cebu Provincial Police Office (CPPO), si Welbert Inilog, 27, mireport sa kapolisan tungod sa paghikog sa iyang kapuyo nga si Emelita pinaagi sa paghikot og pisi sa liog tungod sa grabeng selos ngadto kaniya.
Sa laing insidente, usa ka kargador ang nagpakamatay pinaagi sa paghigot og electrical wire sa iyang liog human wala na makaagwanta sa sakit nga arthritis. Naghikog kini sa ilang balay sa barangay Don Gregorio, Borbon niadtong milabay’ng buntag.
Si Carlito Urot, 58, ulitawo, nagpuyo sa nahisgutang lugar usa ka kargador sa merkado sa lungsod napalgan na lang nga baho na sa iyang mga kabanay nga nagbitay sa atop sulod sa ilang balay.
Si PO3 Edgar Novabos sa Borbon Police Station nga gikahinabi sa Banat News nagkanayon nga si Urot dugay nang nag-antos sa sakit nga arthritis ug posibling sa kaguol nga walay maka-atiman tungod kay masakiton usab ang iyang igsoon nagkutlo kini sa iyang kinabuhi. –BANAT NEWS