CEBU, Philippines - Ang Cebu Energy Development Corporation (CEDC) milusad og programang “Kabilin” nga gitumong paghimo og mga lakang aron matabangan pagsulbad ang pagkaguba sa kalikupan.
Uban sa Toledo Power Corporation, ang CEDC nga mopadagan og 246-megawatt circulating fluidized bed clean coal-fired power plant sa barangay Daanglungsod, Toledo sayo sunod tuig, milusad sa Kabilin isip usa ka “environmental” ug “livelihood legacy program.”
Si Miren Facultad, corporate communications manager sa CEDC mipahibalo nga ang maong programa gitumong aron matabangan ang pagpahiuli sa nadaot nga kalikupan pinaagi sa pagpananom og kahoy, pag-abag sa panginabuhian ug pagpabilin sa buhilaman sa palibot ug tubigan sa ilawom sa yuta.
Gipaabot nga makatabang ang programa pagsaka sa carbon dioxide ngadto sa kapunawpunawan ug paghatag og abag-panginabuhian sa mga residente sa palibot sa power plant nga gitukod sa CEDC.
Sa maong programa, 100 ektaryang tanaman ang duawon aron tamnan og 180 mil ka mga kahoy ug bakhaw nga dumalahon sa komunidad. Buot sa kompaniya nga makakuha og 70 mil ka seedlings kada tuig.
Si Jesus Alcordo, presidente sa CEDC, nagkanayon nga bukas ang ilang kompaniya pagpakig-alayon sa mga environmentalist aron ma-monitor ang operasyon sa planta unya sa Toledo.
Apan giklaro ni Alcordo nga walay angay kabalak-an ang mga Sugboanon sa bag-ong power plant sa Toledo tungod kay mga bag-o ug modernong kahimanan ang gigamit, dili sama kaniadto nga makadaot gyud sa kalikupan tungod sa mga kemikal nga mabuga.
Sumala pa ni Alcordo nga ang proyekto sa Toledo gitawag og clean coal-fired power plant sa usa ka independenteng pagtuon sa Estados Unidos tungod kay sa teknolohiyang gigamit niini pagsala sa coal ash aron dili moadto sa kapunawpunawan ug moguba sa kalikupan. Ang CEDC naglantaw nga ang coal ash isuplay sa mga pabrika sa semento tungod kay may sagol kini nga calcium sulfate nga sambog sa semento ug ubang construction materials. Ang uban niini mahimong gamiton alang sa livelihood program sa mga taga Toledo pinaagi sa paghimo sa abog ug hallow blocks. –BANAT NEWS