CEBU, Philippines - Gihatagan ni Mayor Socrates Fernandez sa dakbayan sa Talisay og unom ka adlaw ang tawo nga mikoral sa usa ka basketball court sa sitio Kalmar barangay Lawaan I, dakbayan sa Talisay, sa pagtangtang sa nahisgutang koral, matud ni Kapitan Jerson Laceda sa Lawaan I.
Si Laceda mibutyag sa Banat News kagahapon , nga niadtong Martes sa buntag si Estrella Bas ug mga opisyal sa kagamhanan sa maong dakbayan miadto sa buhatan sa mayor ug ilang gituki ang bahin sa giingong pagpakoral ni Bas sa basketball court diha sa ilang lugar kay iyang patukoran og balay sa iyang mga sakop.
Kahinumdoman nga niadtong Sabado ang mga molupyo sa maong lugar nagkagubot tungod sa gibuhat ni Bas.
Kini sa dihang nakita nila si Bas nga nagsukod-sukod sa basketball court ug mipakoral niini.
Kahinumdoman usab nga si Bas kinsa nangangkong presidente sa Kalmar Urban Poor Community Association (KUPCA) gipasakaan og kaso sa kanhi niya mga miyembro tungod sa giingong pagpangolekta niini og salapi nga walay klarong resibo.
Gumikan niini naghugpong ang mga molupyo sa maong lugar ug nagtukod og laing organisasyon nga gitawag nga Lawaan Urban Poor Association (LUPA) nga gidumala sa ilang presidente nga si Nenita Monasterio.
Si Laceda mibutyag sa Banat News nga sa ilang miting kauban sa mga opisyal sa dakbayan, si Bas gihatagan og pito ka adlaw sa mayor sugod niadtong Martes hangtud karong Domingo sa paglarot sa koral sa palibot sa basketball court.
Matud ni Laceda nga ang mayor mibahad kang Bas nga kung dili laroton niini ang nahisgutang koral ang task force na sa siyudad maoy molarot niini.
Si Laceda midugang nga gipasabot sa mayor nga bisan og squatter ang nahisgutang lugar nagkinahanglan kini og recreation area aron dunay makalingawan ang mga batan-on sa maong dapit. – BANAT NEWS