CEBU, Philippines - Dugangan og mga personnel sa kapulisan sa dakbayan sa Sugbu ang lugar diha sa barangay Tabunan nga makaabag sa Cebu City Mobile Group (CCMG) sa pagbantay sa kahapsay ug kalinaw sa mga bukirang barangay.
Kini maoy gipahibalo ni Sr. Supt. Patrocinio Comendador, director sa kapulisan sa dakbayan sa Sugbu subay usab sa mga gika-report nga panagbangi sa kampo ni retired PNP General Tiburcio Fusilero ug mga mag-uuma diha sa sitio Cantipla barangay Tabunan ning dakbayan.
Gibutyag niini nga kaniadto pa nila gipabutangan og police ang maong lugar dihang nahitabo ang panagbangi sa mga mag-uuma sa nahisgutang nga ubos sa pagdumala ni Supt. Eliseo Castronuevo ang hepe sa CCMG.
Giklaro niini nga sa pagkakaron wala pa siya makadawat og formal nga komunikasyon ni Mayor Tomas Osmeña, labot niini apan alang kaniya common ang ilang objective nga mamentinar ang kahapsay ug kalinaw sa nahisgutang dapit.
Gusto usab nila sa CCPO nga manginlabot na ang mga opisyal sa Department of Environment and Natural Resources (DENR) tungod kay kini maoy ugat sa isyu sa panagbangi labot sa pagtikad sa kayutaan diha sa Cantipla barangay Tabunan.
Nasayran nga si Mayor Tomas Osmeña nag-plano nang ipa-revoke usab ang kasabutan nila ni Fusilero ug DENR ug pabutangan og dugang polis.
Kini human nipasalig ang mayor ngadto sa mga mag-uuma nga panalipdan gikan sa mga armadong tawo nga gidudahang mga sakop ni Fusilero nga gipanghimakak usab sa kanhi heneral. (Guam Logroño) (BANAT NEWS)