CEBU, Philippines - Namatay ang usa ka tawo kinsa giulo pagpusil sa kauban niyang kustomer sa videokehan didto sa sitio Kapaping, barangay Basak, dakbayan sa Lapulapu kagahapon sa alas 12 pasado sa tungang gabii.
Ang biktima mao si Eduardo Godinez, 5, minyo ug care taker sa Island Venture nga nahimutang usab sa Kapaping.
Ang suspetsado mao si Nelson Bendaros Dagangon, 36, ulitawo ug silingan ra usab sa biktima. Si SPO3 Rex Ybanez sa homicide section sa kapolisan sa maong dakbayan nga nahinabi sa Banat News miingon nga nagkinantahay sa videokehan ang biktima ug ang suspetsado dihang nanag-ilog kini sa microphone nga maoy hinungdan sa panaglalis sa duha.
Gumikan sa kainit sa maong lalis, ang suspetsado kinsa nahutdan na sa katarungan milanit sa gitangkil niining .38 kalibre nga revolver ug gidul-it sa pagpabuto sa luyong bahin sa bagolbagol sa biktima nga maoy hinungdan sa hinanaling kamatayon sa naulahi.
Matud pa ni SPO3 Rex Ybanez nga paingon na sila sa pagtubag og usa ka alarma dihang miabot sa ilang buhatan ang suspetsado aron sa pagtahan sa iyang kaugalingon uban sa armas niini nga may usa ka buhing bala ug usa ka kabhang sa bala.
Si SPO3 Ybanez miingon nga ang suspetsado gibalhog dayon nila sa bilanggoan ug nagpaabot sa tukmang kiha nga isang-at batok kaniya. – BANAT NEWS