CEBU, Philippines - Patay ang usa ka 21-anyos nga lalaki nga graduating sa kursong dentistry human miunay pagpusil sa iyang ulo gamit ang kalibre. 38 revolver kagahapon sa buntag diha sa sitio Hollow Blocks, barangay Tabunok, dakbayan sa Talisay.
Ang naghikog giilang si Benly Byzan, residente sa nahisgutang lugar, graduating sa dentistry kinsa nakaangkon og usa ka samad pinusilan sa tuong bahin sa iyang ulo.
Dali unta kining gidala sa Chong Hua Hospital sa mga sakop sa Talisay Rescue Emergency Action Team (TREAT) apan wala na kini makaabot nga buhi sa nahisgutang tambalanan.
Sila si PO2 Narciso Alforque, PO1 Erwin Denila ug PO1 Jundave David ang daling miresponde sa maong hitabo human sila makadawat og tawag sa usa ka tanod sa maong barangay kabahin sa insidente.
Si David nga nahinabi sa Banat News kagahapon nagkanayon nga ang mga sakop sa Scene of the Crime Operative dunay nakuhang suicide letter diha sa ibabaw sa laptop ni Byzan.
Matud ni David nga dunay parte sa maong suicide letter nagkanayon nga dili siya lig-on sama sa iyang mga ginikanan hinungdan nga giunay niya sa pagpatay ang iyang kaugalingon.
Ang mga ginikanan ni Byzan ang daling miuli ug kagahapon sa buntag sayo naabot kini gikan sa Mindanao.
Si David midugang nga mga pasado alas 4:00 sa kaadlawon si Byzan mipadala og text sa iyang inahan nga nagpahibawong ang iyang sakyanan nga Isuzu Crosswind nga iyang gimaneho nakadasmag.
Ang kapolisan mipahigayon og follow-up nga imbestigasyon sa maong insidente aron masusi kung duna o wala bay foul play ang hitabo. – BANAT NEWS