CEBU, Philippines - Duha ka gikatahapang pusher og shabu ang nadakpan sa buy bust operation sa Philippine Drug Enforcement Agency (PDEA) 7 ug nasakmitan og 87 ka paketeng shabu.
Ang buy bust gihimo alas 4 pasado ang takna sa hapon niadtong miaging adlaw sa barangay Bangbang sa lungsod sa Cordova nga miresulta sa pagkasikop nila ni Michael Berdin ug Walter Sumagang.
Si Jessie Tabanao nga maoy tigpamaba sa PDEA 7 dihang nahinabi sa Banat News miingon nga milungtad og pipila ka bulan ang ilang pagpaniid sa ilegal nga kalihokan ni Berdin nga giilang level 2 nga pusher sa maong lugar.
Gipalitan sa mga ahente og duha ka paketeng shabu si Berdin sa kantidad nga P250 ug dihang nakumpirmar dali kining gisikop, si Sumagang naaktuhan usab diha sa dapit nga gituuhang mipalit usab og shabu.
Dugang pa ni Tabanao nga ilang girekisa ang bulsa ni Sumagang ug nakuha ang 87 ka paketeng shabu nga ilang gituohang gipalit usab niini kang Berdin.
Sa laing bahin sayo sa buntag kagahapon ang PDEA 7 mihimo usab sa pagronda sa panimalay ni Demon Militante sa barangay Paknaan, dakbayan sa Mandaue.
Apan tungod kay sudlonon ang dapit ni Militante nakaikyas kini una pa makaabot ang mga awtoridad nga armado og search warrant nga giluwatan ni Regional Trial Court Meindrado Paredes.
Nakakuha hinuon gihapon ang PDEA ug usa ka dakong pakete sa shabu maong bisan wala kini madakpi kasuhan gihapon kini. (Romeo Limpangog) (BANAT NEWS)