CEBU, Philippines - Gipanghimakak ni Bise Mayor Carlo Pontico Fortuna ang mga taho nga ilang gitibhangan ang gahing pundo sa mga traffic enforcers maong gikuhaan og 22 na lamang ka adlaw ang ilang trabaho gikan sa 26 ka adlaw.
Si Bise Mayor Fortuna nga nahinabi sa DyKC kagahapon miingon wala nila tibhangi ang adlaw tingtrabaho sa mga traffic enforcer tungod kay nasayod ang konseho sa sitwasyon sa mga enforcers.
Gitataw niyang sa ilang giaprobahang gahin alang sa mga traffic enforcers mas gipadak-an pa gani nila ang sweldo ug wala sila’y kasayuran sa pagkibhang sa adlaw tingtrabaho tungod kay walay labot niini ang konseho.
Si Fortuna miingon nga ang 105 ka mga traffic enforcers nagdawat lamang kaniadto og P235 ug ilang gikauyonan sa konseho nga usbawan kini ngadto sa P265 ang matag adlaw.
Nunot sa pagtibhang og adlaw sa ilang pagtrabaho ang mga traffic enforcer magdawat na unta og P6,000 kapin nga sweldo sulod sa 26 ka adlaw nilang pagtambong og trabaho.
Kun matibhangan ngadto na lamang sa 22 ka adlaw P5,000 na lamang ang ilang madawat.
Hinuon si Domingo Cortes nga maoy media liaison officer sa Traffic Enforcement Agency of Mandaue (TEAM) dihang nahinabi sa mga tigbalita miingon nga dunay mga traffic enforcers nga mipadayag nga bisan paman sa maong tibhang sa mga adlaw mo-duty gihapon sila. Si Bise Mayor Fortuna nagkanayon nga ilaha pang gisubay karon kung kinsay mimando nga kuhaan og upat ka adlaw ang tingtrabaho sa mga enforcer apan sa habig sa Konseho matud pa niini wala tibhangi ang pundo alang sa maong buhatan. - Romeo Limpangog (BANAT NEWS)