CEBU, Philippines - Gihulagway sa usa ka sakop sa oposisyon sa siyudad sa Sugbu nga may bulok sa politika ang bag-o lang nahulmang Traffic Response Office (TRO).
Ang TRO gilangkuban sa mga barangay konsehal sa dakbayan nga gi-deputized na sa City Integrated Traffic Operations and Management (Citom).
Kini human usab mopaubos sa upat ka adlaw nga training alang sa pagpatuman sa mga lagda sa trapiko diha sa kadalanan sa dakbayan.
Mahimo na usab silang makapanakop sa mga traffic violators, tungod kay kini nahatagan na og gahom nga maka-isyo og citation tickets.
Apan taliwa sa maayong tumong pagmugna sa TRO nagduda gihapon si Tinago barangay councilor Joel Garganera sa katuyoan niini.
Kini tungod kay pangalan pa lang sa grupo giingong nag-representar na sa lider sa Bando Osmeña Pundok Kauswagan (BOPK) nga si Mayor Tomas dela Rama Osmeña.
“Klaro and very glaring, klaro man gyud na nga pamolitika sa mayor, by the acronym itself TRO iya man na Tomas R. Osmena,” sumala ni Garganera.
Dali hinuong gisalikway sa presidente sa Barangay Councilors’ League of the Philippines (BCLP) Cebu City Chapter, Manuel Guanzon, ang pagduda ni Garganera.
Matud ni Guanzon nga ang TRO wala maglambigit sa pangulo sa BOPK nga si Osmeña kun dili kini giingong kalit lang nahuna-hunaan sa grupo. Gani si Guanzon nga konsehal usab sa barangay Capitol Site miingon nga dunay mga sakop sa oposisyon sa siyudad nga nagpa-miyembro sa TRO.
“Wala man gyud nay politika ang pagkatukod sa TRO, ang amo lang nga matabangan ang Citom pagpahapsay sa dagan sa trapiko sa siyudad,” sumala ni Guanzon.
Bugtong panghinaot ni Garganera nga mosunod ang mga barangay councilors nga sakop sa TRO sa gipanumpaan niini isip mga deputized agents sa Citom. (Elly Bolonos) (BANAT NEWS)