CEBU, Philippines - Usa ka 50 anyos nga drayber sa taxi kinsa gituohang giatake sa sakit sa kasing-kasing, napalgang patay sa sulod sa gimaniho niyang taxi nga nag-parking sa gawas sa usa ka motel sa dalan Hernan Cortes Avenue, barangay Banilad, dakbayan sa Mandaue sa miaging gabii.
Si Inspector Gregorio Aninon, hepe sa homicide section sa Mandaue City Police Office (MCPO) miila sa namatay nga si Jose Badinas, 50 , minyo, nga taga sitio Taduko, barangay Talamban, dakbayan sa Sugbo.
Matud pa ni Inspector Aninon nga usa ka Francis Joseph Kho, 22, ulitawo nga nagpuyo sa maong dapit maoy mipahibalo sa ilang buhatan kalabot sa nakita niining tawo nga nagbuy-od ug mituskig na sa sulod sa SD taxi nga nagdala sa plate number nga GXC 916.
Sa ilang pakisusi nga gihimo, ilang nasayran nga ang namatay maoy nagmaneho sa maong sakyanan ug gituohang giataki kini sa sakit sa kasingkasing. – BANAT NEWS