CEBU, Philippines - Giangkon sa Department of Veterinary Medicine and Fisheries (DVMF) sa Cebu City Hall nga gamay ra ang nagpakapon ug nagpa-ligate sa mga iro ug iring dinhi sa siyudad.
Kini sukad gibuksan ang Animal Birth Control Clinic sa DVMF niadtong miaging buwan sa Marso alang sa nahisgutang katuyoan. Nasayran nga ang klinika nakakapon lang og 233, ug naka-ligate lang usab og 34 ka mga iring ug iro sukad sa buwan sa Marso hangtud sa miaging buwan. Ang labaw sa DVMF nga si Doctor Alice Utlang nihulagway niini nga labihang gamaya ra itandi sa ilang gipaabot nga dalhon sa ilang klinika.
Gibana-bana ni Utlang nga ang dakbayan duna karoy dul-an sa usa ka gatos ka libo ka mga iring ug iro nga gipamuhi sa mga pet lovers.
Apan tungod sa kagamay sa ilang na-ligate ug nakapon nga mga iring ug iro subling nanawagan si Utlang ngadto sa mga pet owners sa siyudad.
Gipahibawo sa labaw sa DVMF nga gamay ra ang mabayran niadtong mga pet owners nga gusto mopahimulos sa ilang gitanyag nga serbisyo.
“Mogasto lang og 150 pesos sa bayranan for registration, the rest libre na like libreng kapon, ligate, bakuna, dog tag and collar, vitamins, de-worming for the whole year,” matud pa ni Utlang.
Gitataw ni Utlang nga ang nahisgutang programa maoy kabahin sa ilang tinguha nga mapugngan ang population explosion sa mga iring ug iro dinhi sa siyudad.
Kini ilabi na nga gipangandoy sa DVMF nga mamahimong rabies-free ang kinatibuk-ang dakbayan sugod sa sunog tuig.
Gipahibawo hinuon ni Utlang nga sila wala na makatala og kaso sa rabies nga nitakboy sa tawo niining tuiga dinhi sa siyudad. – BANAT NEWS