CEBU, Philippines - Usa ka dalaga nga German national gikawatan sa iyang mga mahalong butang samtang mi-check-in sa Kota Beach Resort sa Poblacion, lungsod sa Sta Fe, isla sa Bantayan niadtong Huwebes sa alas 7:30 sa gabii.
Ang biktima mao si Anne Marrie Baier, 24, dalaga, lumad nga taga Germany ug temporaryong mi-check in sa maong beach resort.
Matud ni PO2 Anthony Illut sa Sta Fe Police Station sa dihang nahinabi sa Banat News ang biktima mi-check in niana pang pagka adlawan ug pagka gabii migawas kini sa giabangan nga lawak aron sa pagpanihapon.
Apan sa dihang nahuman na sa panihapon ang biktima mibalik kini sa iyang gi-abangan nga cottage ug sa iyang pag-abot nakugang na lang kay abli na ang pultahan ug pagsulod niya nagkatag na ang mga butang.
Sa dihang gisusi ni Baier nawala na ang mahalon niining Cannon Camera nga mokantidad og P8 mil ingon man ang Ipod MP3 player nga mokantidad og P25 mil.
Walay nahimo ang biktima gawas sa pagpa-blotter sa kapolisan sa maong panghitabo samtang ang kapolisan padayon pa sa ilang pakisusi sa maong nahitabong pagpangawat.
Wala isalikway sa nagpadayong pakisusi ang posibilidad nga posibling inside job ang maong panghitabo. - Darrel A. Carumba (BANAT NEWS)