CEBU, Philippines - Dead-on-arrival sa pribadong tambalanan ang usa ka stock clerk sa usa ka dakong mall nga nahimutang sa uptown ning dakbayan sa Sugbu human gidunggab sulod sa maong tindahan sa kapuyo sa iyang gika-relasyon kagahapon sa alas 5:00 sa hapon.
Ang namatay giila sa kapulisan nga si Arnold Bonghanoy, 20, ulitawo, taga V. Rama ning dakbayan human makaangkon og daghang samad dinunggaban sa iyang lawas.
Wala hinuon makaeskapo ang suspek nga si Melvin Compra, 26, lumad nga taga Tabugon, Cebu ug kasamtangang nagpuyo sa Wireless sa dakbayan sa Mandaue.
Si PO3 Geoffrey Gutual, imbestigador sa Homicide Section sa pakighinabi sa Banat News mibutyag nga anha pa gipalit sa ikaupat nga andana sa maong mall ni Compra ang kutsilyong iyang gigamit sa pagpatay.
Matud pang Gutual, kalit gitampukan ni Compra ang buko-buko sa biktima, ang naulahi misuway og dagan sa opisina sa wholesale department apan wala siya lung-i sa suspek nga migukod ug gitiwasan siya diha sa sulod.
Ang mga kaubanan sa trabaho sa biktima daling mikuninit sa suspek hinungdan nga kini nadisarmahan ug gikulata og maayo maong hasta kini nalandig sa Cebu City Medical Center.
Matud pang Gutual, si Bonghanoy giingong uyab sa kapuyo sa suspek nga si Arlene Nuñez nga usa usab ka promodiser. Si Compra ug Nuñez dunay anak nga 4-anyos nga lalaki.
Dako ang pagtuo ni Gutual nga selos ang hinungdan sa pagpatay.
Si Bonghanoy gidali og dala sa Perpetual Succour Hospital apan nabugtoan kini sa kinabuhi sumala pang Gutual. – BANAT NEWS