CEBU, Philippines - Ang Integrated Bar of the Philippines kon IBP Cebu City Chapter midepensa ni Atty. Benjamin Cabrido ang environmental lawyer nga gisaway karon pag-ayo sa Kapitolyo tungod sa pagkwestyon niini sa napalit nga lote sa Kapitolyo didto sa lungsod sa Naga nga nasanapan sa tubig dagat. Ang presidente sa IBP Cebu City Chapter nga si Atty. Michael Yu maoy nanguna sa nipirma og resolusyon nga nagsuporta ngadto kang Cabrido kinsa gipasanginlan sa mga opisyales sa lalawigan nga may nagpahiping personal nga interest sa isyu sa lote sa Kapitolyo didto sa Naga.
Sigon sa report sa DyRF, si Yu nagkanayon nga nagpadayon ang ilang dakong pagsalig sa kaligdong ug integridad ni Atty. Cabrido nga padayon misaway ug mipasaka og kaso batok sa mga opisyales sa kagamhanan nga napakyas sa pagprotektar sa kalikupan pinaagi sa pagbutang og mga proyekto nga makadaut sa kinaiyahan.
Gipahibawo usab niini ang ubang mga IBP chapter sa ubang probinsiya sa nasud ang nipirma usab og manipesto alang sa pagsuporta sa kawsa ni Atty. Cabrido ug uban pang mga environmental lawyers nga gibatikos sa mga government officials.
Sa iyang bahin, si Atty. Democrito Barcenas ang kanhi presidente sa IBP nagkanayon nga angayan tan-awon una sa mga opisyales sa gobiyerno ang ilang kaugalingon kun sa ilang pangatungdanan nakaprotektar ba sila sa kalikupan una pa sila mosaway kang Atty. Cabrido. (Chester Abadilla) (BANAT NEWS)