CEBU, Philippines - Padayon pang gipangita sa kapolisan ang usa ka barangay tanod nga mipusil patay sa usa ka 17 anyos nga lalaki didto sa barangay Looc, dakbayan sa Lapulapu, sa miaging gabii.
Si SPO1 Jack Inihao sa homicide section sa kapolisan sa maong dakbayan nagkanayon nga si Louie Deguilmo alyas Wewe, nga usa ka tanod sa Looc uban ang kauban niining nailhan lang nga Sandy gipasakaan na og kiha sa korte.
Kini human niya pusila patay si Joel Pinas Jr. 17, nga taga Looc.
Dugang pa ni SPO1 Inihao nga walay sala ang biktima kay gikan kining mitambong sa disco dihang gipusil sa suspetsado sa walay igong hinungdan.
Midughang siya nga sa wala pa pusila, gikuweliohan pa ni Deguilmo ang biktima, unya gitionan sa iyang armasa de fuego ang tangkugo niini dayong pabuto, hinungdan sa hinanaling kamatayon sa biktima.
Sa pagkakaron gipangita pa sa kapolisan si Deguilmo ug si Sandy nga kauban niini aron papanubagon sa ilang sala. (Romeo T. Limpangog) (BANAT NEWS)