CEBU, Philippines - Nakuyapan ang teller sa usa ka lotto outlet sa dakbayan sa Mandaue dihang gihapak og kandado ang ulo niini sa usa ka tulisang tomboy nga midagit sa P21,000 sa biktima, didto sa Lotto outlet sa sitio Pilit, barangay Cabanalan, dakbayan sa Mandaue, sa miaging gabii.
Ang biktima mao si Arlyn Belarmino, 37, minyo, nga taga Poblacion, Liloan ug teller sa lotto outlet nga nahimutang sa sitio Pilit.
Si SPO4 Gil Roco sa kapolisan sa Presinto 4 sa Casuntingan sa maong dakbayan mibutyag sa Banat News nga kuyog sa wala hiilhing tomboy ang usa ka lalaki nga maoy nagmaneho sa giluwanan nilang motorsiklo.
Unya pag-abot nila sa maong lugar , giduol sa tomboy ang teller ug mihangyo nga modula kini sa Keno Machine.
Midugang si SPO4 Roco nga sa paggawas sa biktima gikan sa booth aron ablihan ang Keno machine, kalit nga gihapak og kandado sa tomboy ang iyang ulo hinungdan nga nakuyapan siya.
Gumikan niini nakasulod sa booth ang tomboy ug gihurot og kuha ang salapi nga halin sa tiket nga mokabat og P21,000.
Dayon misakay kini pagbalik sa motorsiklo ug mipahilayo sa maong dapit ug gipangita na karon sa kapolisan. (BANAT NEWS)