CEBU, Philippines - Napalgang patay ang usa ka sakop sa kasundalohan sa sulod sa lawak sa panimalay nga iyang gipuy-an nga nahimutang sa sulod sa compound sa General Benito Ebuen Airbase sa barangay Mactan, dakbayan sa Lapulapu.
Ang namatay mao si Master Sgt. Anastacio Ferarin, sakop sa Philippine Army nga nadestino sa Central Command sa Lahug, dakbayan sa Sugbo.
Si PO3 Candido Baringue sa homicide section sa kapolisan sa maong dakbayan mibutyag nga ang boardmate sa namatay nga si Divina Canete, maoy unang nakadiskubre sa patay’ng lawas niini alas- 3 pasado ang takna sa kaadlawon.
Maong nagdali kini sa pagpangayog panabang sa mga silingan kinsa mitaho usab ngadto sa ilang buhatan, wala usab matino kun unsay gikamatyan sa maong sundalo.
Dugang pa ni Baringue nga gidala sa Rolling Hills sa Banilad, dakbayan sa Mandaue ang patay’ng lawas sa maong sundalo alang sa pagahimuong autopsy sa pagsuta sa hinungdan sa kamatayon niini. – BANAT NEWS