CEBU, Philippines - Duguon ang nahitabo kagahapong adlawa human duha ka mga magtiayon ang nagpinatyanay sa managlahing mga dapit dinhi sa dakbayan.
Diha sa Saint Lawrence St. sa La Guardia barangay Lahug, nagdinunggabay ang managpuyo-puyo atubangan sa ilang usa pa ka tuig nga anak gumikan sa selos.
Parehong wala nay kinabuhi sila si Ana Marie Nuez, 28, usa ka call center agent ug kapuyo niining si Von Eric Moyo, 28, pulos mga lumad sa Camalig, Albay sa lalawigan sa Bicol.
Naabtan sa taga Cebu City Police Office Homicide Section ang patay’ng lawas sa duroha nga naglunang sa ilang kaugalingong dugo diha sa kusina sa giabangang panimalay.
Ang babaye gikatahong nakaangkon og daghang samad dinunggaban sa kalawasan lakip na ang lalaki apan ang naulahi naabtan pang dunay nagtaop nga duha ka kutsilyo diha sa kutokuto ug sa likod.
Matud pa sa ka-boardmate sa duroha nga si Jude Fuertes nakadungog siya sa pagsiyagit ni Nuez nga nagpakitabang hinungdan nga ila kining gisusi ug maoy iyang nakitang gitusak-tusak kini ni Moyo og kutsilyo.
Ilaha untang kuhaon ang bata apan gibabagan sila ni Moyo samtang padayong gitusak-tusak ang lawas ni Nuez, maong sa kahadlok nila midagan sila ug nanawag og tabang.
Apan sa ilang pagbalik pulos na naglunang sa dugo ang duruha sanglit si Moyo duna say dinunggaban. Nakuha sa crime scene sa kapolisan ang upat ka kutsilyo.Gisusi pa karon sa kapolisan ang sulod sa inbox sa mga cellphone sa duha aron pagpangita og clue kabahin sa maong krimen.
Nasayran usab sa Banat News sa pakighinabi ni PO3 Geoffrey Gutual sa Cebu City Police Office Homicide Section nga base sa text giplanohan na ni Nuez nga biyaan si Moyo. Gituohang aduna na kini laing uyab base sa gibutyag ni Faith Sollano nga ilaha usab ka-boardmate.
Si Moyo giingong bag-ohay pang naabot sa Sugbo, giingong si Nuez Abril pa nakapuyo dinhi.
Si Gutual nagkanayon nga base sa ID ni Nuez minyo kini apan dili kang Moyo. Dugang pa niini, hubog usab niadtong tungura si Moyo kay nakig-inom pa kini sa mga boardmates sa sayo pa niana. (BANAT NEWS)