CEBU, Philippines - Nagpabilin gihapong normal ang kalihukan sa Cebu City Zoo bisan pa man sa subli na usab nga pag-inilogay sa siyudad ug probinsya sa luna nga nahimutangan niini.
Kini maoy giklaro ni (Father) Giovanni Romarate, ang administrador sa nahisgutang pasilidad dihang nahinabi sa Banat News kagahapong adlawa.
Matud pa ni Romarate nga nagpadayon ang ilang pag-abi-abi sa mga bisita nga gustong motan-aw sa nagkadaiyang mga hayop sa zoo.
Ang nahisgutang animal park duna karoy labing minos 15 ka klase sa mga mananap nga naglakip sa buaya, unggoy, langgam, karnero, tigre ug uban pa.
Gipaabot sa zoo administrator nga madugangan pa ang maong mga hayop kung matigayon na ang pagpakiglambigit sa siyudad ngadto sa usa ka magpapatigayon.
Nasayran nga dunay nag-ungot nga kasabutan tali sa City government ug ni Robert Yopangco alang sa pagpalambo sa zoo. Apan gitun-an pa gani sa City Council ang Memorandum of Agreement (MOA) alang niini, mipasidaan na usab ang kagamhanan sa lalawigan ngadto sa dakbayan.
Giinsister sa Kapitolyo nga maoy tag-iya sa pito ka ektaryang luna sa zoo ug gikinahanglan ang pagtugot niini sa bisan unsang development nga pagahimuon.
Nagtuo hinoon si Romarate nga ang duha ka lokal nga kagamhanan pulos ganahan og zoo apan tungod sa politikanhong kasungian nagkasungi usab ang baruganan. (Elly Bolonos) (BANAT NEWS)