CEBU, Philippines - Nanawagan si Bise Gobernador Gregorio Sanchez nga mo-resign sa katungdanan ang mga opisyal nga nalambigit sa kuwestiyonableng 25 ka hektaryang lote sa pamilyang Balili sa lungsod sa Naga nga napalit sa Kapitolyo sa kantidad nga P98 milyones. Si Sanchez miangkon nga ang tibuok hunta probinsiyal nga iyang gipangulohan, naapektohan na pag-ayo sa maong kontrobersiya. Kini tungod kay alang kaniya, ang tanang mga sakop sa hunta masuspetsahan nga nakigsabot sa buhatan ni Gobernador Gwendolyn Garcia ug sa tag-iya sa napalit nga lote nga napamatud-an nga hapit tanan niini naglubog sa tubig dagat.
Si Sanchez mitug-an nga gawas sa imbestigasyon nga gipasiugdahan sa buhatan sa gobernadora, ang hunta probinsiyal mopahigayon usab og linaing pakisusi. Iyang gipahibalo nga karong adlaw'ng Lunes, ilang giimbentar sa ilang sinemanang sesyon ang administrator sa Balili property nga si Atty. Romeo Balili, Naga mayor Valdemar Chiong, abogado nga staff ni bokal Juan Bolo nga maoy mi-notaryo sa kontrata sa Kapitolyo sa pamilyang Balili, gawas lamang nag-broker sa maong deal nga si Lumen Durano kinsa mitaliwan na sa laing kalibutan. Si Sanchez nagkanayon usab nga angayan nga si Garcia mopadala og sulat ngadto sa DENR aron makuha ang dokumento nga nagtumbok nga ang lote nga napalit naapil sa conversion proceeding sa DENR tungod kay kini kadagatan ug kabakhawan. Misugyot usab si Sanchez nga maayo gyud unta nga may ratification o laing authorization gikan sa hunta probinsiyal ang tanang sudlan nga transaksiyon sa gobernadora aron pagsiguro nga walay moabot pang bulilyaso. - BANAT NEWS