CEBU, Philippines - Kritikal ang kahimtang sa usa ka lalaki human kini gikulata, gitambog sa dagat ug gipusil sa grupo sa mga rugby boys kuyog ang usa ka ex-convict nga iyang gibadlong nga dili palanguyon sa dagat sa sitio Paradise, barangay Pajo sa dakbayan sa Lapulapu kagahapon sa buntag.
Ang biktima mao si Freddie Tumabini, 25, residente sa maong dapit ug usa ka aircon technician.
Samtang gitumbok nga responsable sa maong pagpamusil mao si Jackjack Loseo kuyog nila ni Jongjong Loseo ug duha ka naila lang sa mga alyas nga Joel ug Nono pulos mga residente usab sa maong dapit.
Matud pa ni Ellen Tagpuno, bayaw sa biktima nga sayo pa niini iyang gibadlong ang grupo ni Loseo nga nag-ambak-ambak sa ilang taytayan diin ang ubos nga bahin niini mao na ang dagat nga taob niadtong higayona.
Gibadlong ni Tagpuno ang mga suspetsado gumikan kay gubaon ang ilang taytayan nga kawayan nga maoy ilang agianan kay delikadong maguba kini.
Apan ang pasidaan ni Tagpuno gikasuko ni Jackjack hinungdan nga migawas ni Tumabini ug mikomprontase sa grupo apan mitumaw ang mainiton nilang panaglalis.
Si Loseo (Jackjack) miuli sa ilang panimalay ug sa pagbalik nagdala na kini og pusil dayong mando sa iyang igsuong si Jongjong, Joel ug Nono nga bunloton paggawas sa panimalay si Tumabini kay ilang patyon. - BANAT NEWS