CEBU, Philippines - Upat ka mga Alumni ang pasidunggan sa University of San Carlos (USC) tungod sa tagsa-tagsa nila ka mga kontribusyon sa natad sa patigayon ug pagpalambo sa komunidad. Sa press conference kagahapon sa Cebu City Sports Club, ang USC Alumni Association mipahibalong mopasidungog nila ni Ofelia “Ofel” Odilao-Bisnar, Atty. Tomas Riveral, Michael Francis Lopez ug Lahug barangay captain Mary Ann Delos Santos.
Si Phillip Tan, director sa USC Alumni Association nagkanayon nga ang upat ka personalidad pasidunggan atol sa culminating sa USC Alumni Homecoming karong Agosto 30 diha sa Grand Convention Center.
Atol sa awarding ceremony nga gipangulohan og 1st Semper Fidelis Awards, si Odilao-Bisnar modawat sa Scientia (Knowledge) Award tungod sa iyang kalampusan sa natad sa management, research ug statistics. Si Odilao-Bisnar lakip sa batch 85 sa USC sa kursong AB Economics.
Si Atty. Riveral kinsa mao ang presidente sa Oriental Port and Allied Services Corporation (OPASCOR) mao usab ang awardee sa Virtus (Leadership) Category. Si Riveral nga nigraduwar sa kursong BSC in Accounting niadtong tuig 1985, nakatampo og dako sa pagpalambo sa OPASCOR nga maoy usa sa mga malampusong cargo handling labor sector.
Ang labing batan-ong Alumni awardee sa kasaysayan sa USC Alumni mao si Michael Flores Lopez pasidunggan sa Devotio (Service) Category tungod sa iyang paghatag og dakung dungog sa unibersidad human siya mapiling commissioner sa National Youth Commission ni Presidente Gloria Macapagal-Arroyo sa edad nga 22-anyos.
Si Flores mi-gradwar niadtong tuig 2005 sa kursong Major in Advertising Arts gipasidunggan usab nga Outstanding Young Person of the World sa Junior Chamber International sa Osaka Japan.
Nahimo usab outstanding alumni sa USC si barangay kapitan Mary Ann Delos Santos gikan sa batch 88 sa kursong AB Political Science.
Ang USC mo-award ni Delos Santos sa Virtus (Leadership) Category alang sa iyang pagserbisyo sa iyang mga konstituwente sa Barangay Lahug sulod sa 15 ka tuig. Giila usab sa unibersidad ang iyang lakang nga modagan sa mas taas nga posisyon sa sunod nga piniliay isip Kongresista sa North District. Si Fr. Pat De los Reyes, office of the president in Alumni Relations sa USC, naglaom nga ang paghatag sa pasidungog sa ilang mga alumni, mahimong sumbanan sa mga estudyante sa ilang unibersidad. - Lemuel Maglinte