CEBU, Philippines - Andam ang pamilyang Balili pag-uli sa P37 milyones nga bayad sa Kapitolyo alang sa yuta nga gipalit niini apan nasakpan nga siyam ka ektarya naglubog sa tubig-dagat.
Si Atty. Romeo Balili, administrador sa Balili properties, nagkanayon nga dili sila magpanuko pag-uli sa kuwarta ngadto sa Kapitolyo ubos sa kondisyon nga i-uli sa kagamhanan sa lalawigan ang mga titulo sa lote. Ang titulo gikatahong ubos na sa ngalan sa kagamhanan sa lalawigan sa Sugbo.
Gipahibalo usab ni Balili nga motambong siya sa gikatakdang imbestigasyon nga panguluhan ni National Bureau of Investigation (NBI-7) director Medardo Delimos. Si Delimos gitahasan ni Gobernador Gwendolyn Garcia pagsusi sa kontrobersiyal nga pagpalit sa yuta sa mga Balili nga nahimutang sa Tinaan, Naga.
Ang imbestigasyon ipahigayon karong Agosto 24.
Sa laing bahin, si Mayor Valdemar Chiong sa Naga mipadayag og kaandam pagtambong sa sesyon sa hunta probinsiyal sa lalawigan nga nag-imbestigar sa pagpalit sa yuta sa mga Balili.
Si Chiong nagkanayon nga andam siyang mosulti sa iyang nahibaw-an kalabot sa transaksiyon, apan paabuton una niya ang pormal nga imbitasyon gikan sa hunta probinsiyal.
Nasayran nga si Cris Saavedra milambigit kang Chiong sa transaksiyon, apan hingpit kining gipanghimakak sa mayor sa Naga.
Sumala pa ni Chiong nga silang Bokal Juan Bolo ug ang gobernadora ang nagpahibalo kaniya nga paliton sa Kapitolyo ang Balili beach. Gisuportahan niya kini sa pagtuo nga makahatag kini og dakong benepisyo sa mga residente sa Naga. – BANAT NEWS