CEBU, Philippines - Kritikal ang kahimtang sa usa ka ulitawo dihang gipusil kini sa tulo ka tawo nga nagsakay og motorsiklo didto sa Sitio Mahayahay, barangay Bankal, dakbayan sa Lapulapu sa milabay’ng gabii.
Ang biktima mao si Rey Godines Paquibot, 27, ulitawo nga taga Mahayahay.
Si SPO1 Jack Inihao sa Crime Against Persons sa kapolisan sa Lapulapu mibutyag sa Banat News nga ang biktima uban sa iyang mga higala nagbarog-barog sa daplin sa karsada dihang miabot ang tulo ka tawo nga nagsakay og motorsiklo ug ang duha nga nag-angkas maoy nagdungan sa pagluthang sa biktima.
Ang mga samad sa dughan, bukton, hawak ug paa maoy nakapagrabi sa biktima busa gidali dayon siya paghatod ngadto sa Lapulapu City District Hospital samtang nakasibat usab dayon ang mga kriminal nga maoy gipangita karon sa kapolisan. (Bong Soriano)