CEBU, Philippines - Namatay ang usa ka nakainom nga kusinero dihang napantok ang iyang ulo nga walay helmet sa sakyanang giparking sa daplin sa provincial highway sa barangay Maricaban, lungsod sa Sta Fe, isla sa Bantayan nga gidasmagan sa iyang gisakyang motorsiklo niadtong Sabado sa 1:30 sa hapon.
Ang namatay mao si Nelson Pescante Offril Jr., 26, ulitawo, ug kusinero sa Hardcock Bar and Restaurant sa Santa Fe.
Si PO2 Anthony Illut sa Sta Fe Police Station mibutyag sa Banat News nga gikan pa sa iyang trabaho ang biktima ug pauli na sa ilang balay dihang pag-abot sa Maricaban, wala siya kaalinggat sa usa ka giparking nga awto sa daplin sa karsada.
Gumikan kay walay helmet, maayong pagkapantok ang iyang ulo sa sakyanang giungad sa iyang motorsiklo nga maoy hinungdan sa hinanali niyang kamatayon.
Gisuwayan pa og hatod sa iyang pamilya sa tambalanan, apan patay na kini sa paghiabot sa Bantayan District Hospital. - BANAT NEWS