CEBU, Philippines - Hingpit nang giimplementar kagahapon ang Republic Act (R.A.) 9502 kon ang Cheaper and Quality Medicines Act nga maglaslas sa katunga sa naandang presyo sa 21 ka giisip sa Department of Health nga essential drugs kon sagad paliton sa mga tawo.
Ang pag-implementar sa DOH sa nahisgutang balaud gipasubay usab sa Executive Order 821 nga giluwatan ni Presidente Gloria Macapagal Arroyo agi og pagtuman sa Maximum Drug Retail Price nga probisyon sa R.A 9502. Lakip sa gimanduang motuman sa R.A 9502 mao ang mga chain drugstores, hospital pharmacies sa third ug fourth level hospitals sa nasud, ingon man sa tanang drug outlets nga makita sulod sa 500 metros nga gilay-on gikan sa usa ka hospital.
Ang chairman sa Committee on Health sa City Council sa Cebu City nga si Councilor Christopher Alix nanawagan sa DOH nga monitoron ang mga drugstores dinhi sa siyudad kung nituman ba sila niini.
Mosugyot si Alix sa DOH nga mobutang og complaint desk sa ilang buhatan aron dunay kaduolan ang publiko kung dunay reklamo batok sa pagpatuman sa Cheaper and Quality Medicines Act.
“Angayan gyud nga mobutang sila og complaint desk aron dunay kasumbungan ang katawhan aning mga botika nga wa gyud mopaubos sa presyo sa ilang baligya nga tambal ba kay gikinahanglan kaayo na ilabi na niadtong dunay balatian,” sumala ni Alix.
Buot sa konsehal nga masilutan ang mga tag-iya ug tagdumala sa mga dagkong botika sa dakbayan nga nagdumili pagtuman sa mga probisyon nga nalatid sa balaud aron paghatag og mensahe sa uban nga seryoso ang DOH sa pag-implementar niini. (BANAT NEWS)