CEBU, Philippines - Mokapin sa P400 mil ang danyos sa sunog nga naka-ugdaw sa 15 ka mga panimalay kagahapon sa alas 2:20 sa hapon sa sitio Kalubihan Banawa barangay Guadalupe ning dakbayan sa Sugbu.
Si FO3 Antonio Gonzales, imbestigador sa Cebu City Fire Department nga gikahinabi sa Banat News nagkanayon nga ang sunog giisa nila ngadto sa 2nd alarm ug nakontrolar mga alas 2:43 sa hapon mga 23 minutos human sa ilang pag-responde.
Matud pa niini nga ang sunog didto kini magagikan sa panimalay ni Cesar Saballa diin dunay tulo ka pamilya nga nag-abang nga sila si Joel Cuico, Simeon Andan kinsa nag-ukopar sa ground floor samtang si Susan Villagonzalo maoy nag-okupar sa tibuok ikaduhang andana.
Gibutyag niini nga si Susan Villagonzalo nagkanayon nga nanglaba kini sa silong niadtong higayuna dihang dunay kalit nga nibuto sulod sa lawak nga gi-uparan ni Simeon Andan ug daling ni-ulbo ang kalayo.
Nagtuo ang mga imbestigador nga dunay mga appliances nga wala mapalong niadtong higayuna ug nag-short circuit.
Subay ning pagsuwat si FO3 Gonzales ang nangita pa ni Andan aron makuhaan sa iyang pamahayag kini tungod kay wala pa gyud kini mopatim-aw human sa pagbuto sa maong sunog.
Sumala pa niini nga naapil sa hingpit nga nasunog mao ang two door nga apartment, samtang dali kaayong nikatap ang kayo gumikan sa kasikit sa mga panimalay nga ang uban niini mga mix-concrete nga ginama sa mga gaan nga kahoy.
Lima ka mga firetruck gikan sa Cebu City Fire Department ang gipadala sa area inabagan sa barangay Sto. Niño Fire Brigade ug ubang fire volunteers ang nagtinabangay sa pagpawong sa kalayo.
Dunay 25 ka mga pamilya ang naapektuhan sa maong sunog apan mapasalamaton sila gumikan kay walay bisan usa ka mga residenteng naangol.
Ang mga residenti nasunogan kasamtangang nagbutang og mga tent nga temporaryong kahigdaan gikan sa Social Welfare Service sa dakbayan ug barangay Guadalupe. - BANAT NEWS