CEBU, Philippines - Gikatakda kagahapon ang pagpasaka og kasong homicide sa piskaliya sa dakbayan sa Talisay batok sa sakop sa Cebu City Police Office Police Auxiliary Group kinsa mipusil patay sa usa ka construction worker niadtong Martes sa buntag diha sa south coastal road property habig sa barangay San Roque, dakbayan sa Talisay.
Si Superintendent Henry Binas, hepe sa Talisay City Police Station sa pakighinabi sa Banat News kagahapon nagkanayon nga kasong homicide ug dili murder ang ipasaka batok kang Armando Cabatuan kay wala ma-establisar ang “qualifying treachery evidence” batok kaniya.
Kini tungod kay giingong sa wala pa mahitabo ang pagpamusil, nagkalalis pa ang suspek ug ang biktima nga si Gualberto Galleto.
Hinuon matud pa ni Binas nga ang korte na maoy mosusi niini kung tukma ba ang kasong ilang ipasaka batok sa suspek.
Kahinumdoman nga human pusila ni Cabatuan si Galleto, dihadiha mitahan dayon ang nahauna ngadto kang Superintendent Jonathan Abella hepe sa City Intelligence Branch (CIB).
Giakusahan sa suspek ang biktima nga usa sa mga tigtulis sa mga motorista diha sa south coastal road ug niadtong Sabado giingong gisulong siya niini diha sa out post diin siya madestino sa pagbantay tungod kay nasuko kuno ang biktima nga iyang gibadlong nga dili paestambayon didto.
Gani midugang si Cabatuan nga gibaharan kuno siya sa biktima nga patyon siya niini. Si Cabatuan gitugyan sa kapolisan sa Cebu City Police Office (CCPO) ngadto sa kapolisan sa dakbayan sa Talisay.
Si Binas mipasabot nga ang pagsurender ni Cabatuan dili makapakunhod sa silot niini kun makonbikto sa korte tungod kay walay lisensiya ang iyang gigamit nga pusil.
Nasayran nga ang director sa CCPO nga si Sr. Superintendent Patrocinio Comendador misuspenso sa membership ni Cabatuan isip sakop sa Cebu City Police Office Police Auxiliary Group (CCPOPAG).
Gibutyag ni Comendador nga wala sila’y giisyuhan og armas nga mga sakop sa CCPOPAG ug wala usab sila magtugot nga ang ilang mga volunteer makatangkil og armas de fuego sa ilang pag-abag sa kalihukan sa kapolisan. - BANAT NEWS