CEBU, Philippines - Mokapin na usab sa 20 ka mga balay patigayon dinhi sa dakbayan sa Sugbu ang pasirad-an ni Mayor Tomas Osmeña tungod sa kapakyas pagbayad og buhis ug pagdumili paglukat og business permit sa ilang gitukod nga negosyo dinhi sa siyudad.
Ang mga balay patigayon nga pasirad-an ni Osmeña naglakip sa mga boarding houses, tindahan, construction firm, saloon ug uban pa.
Nasayran nga duha ka buhatan sa City Treasurer’s Office ang nirekomendar alang pagpasira sa hingtungdang mga establisamento nga gipirmahan na sa mayor.
Matud pa sa labaw sa Tax Mapping Division, Nanette Sungahid, nga ila pa hinoong i-review ang record sa maapektahang mga business establishment.
“Before to siya i-close, i-verify man to siya namo sa computer kung nakabayad ba gyud o wala, kadtong wala, aw ipatuman gyud ang closure order,” sumala ni Sungahid.
Nagkanayon si Sungahid nga posibleng sa sunod semana na ipatuman ang pagpasira sa nahisgutang mga establisamento nga wala mobayad og buhis.
Kahinumduman nga sa nangaging mga buwan, ubay-ubay usab ka mga balay patigayon sa dakbayan ang gipakandaduhan ni Osmeña.
Kini tungod gihapon sa kapakyas sa mga tag-iya ug tagdumala niini pagbayad sa ilang obligasyon ngadto sa kagamhanan sa dakbayan.
Seryuso karon ang City government pagkolekta og buhis tungod sa kadismaya sa mayor sa tax collection sa nangaging mga buwan.
Gani gipahulipan ni Osmeña ang City Treasurer kaniadto nga si Renee Empaces tungod kay ang mayor wala matagbaw sa performance niini.
Ang bag-ong City Treasurer nga si Ofelia Oliva nipasalig nga iyang buhaton ang tanan nga nalatid sa balaud aron mosaka ang tax collection sa dakbayan. – BANAT NEWS