CEBU, Philippines - Dili pabor ang Simbahang Katoliko sa Sugbo sa giduso nga balaodnon nga mag deklarar ni kanhi Presidente Corazon “Cory” Aquino nga himuon kining national hero.
Si Kongresista Rodulfo Plaza maoy mipadayag nga mopalabang siya og balaudnon sa kongreso aron ideklarar nga nasudnong bayani si kanhi presidente Aquino nga gitawag karun og “Icon of Democracy.”
Apan alang kang Monsenyor Achilles Dakay tigpamaba sa Archdiocese sa Sugbo nga gikinahanglan pa unang tun-an ug susihon og maayo ug dili dali-dalion ang maong tinguha.
Kini human gihulagway sa monsenyor nga dili lang mahimong basihan ang gidaghanon sa mga tawo nga nagsakripisyo uban sa 9 ka oras nga funeral procession taliwala sa pag-uwan uwan didto sa Manila gumikan kay nagtuo siyang dunay uban kanila nga nag-uban uban lang kun gitawag sa monsenyor nga mga “kuyog-baboy” ug wala masayod sa katuyo-an nga ilang giapilan.
Nunot niini ni-apilar si Dakay nga karun nga nahuman na ang paghatud sa katapusang lubnganan sa kanhi presidente nanghinaot siya nga unta molihok na ang tanan alang sa kahiusahan aron maangkon ang tinuoray’ng paglambo sa nasud.
Ang simbahang katoliko sa Sugbo pinangulohan ni Arsobispo Ricardo Cardinal Vidal mipasiugda og mga Santos nga Misa kagahapong adlawa diha sa Cebu Metropolitan Cathedral dungan sa lubong ni kanhi presidente Aquino agi og paghatag og katapusang pagyukbo sa nitaliwang kanhi pamuno nasud.
Nasayran usab nga gikan pa sa pagkamatay sa kanhi presidente niadtong milabay’ng semana sa Makati Medical Center sunod sunod nga mga Santos nga Misa paghatag og katapusang pagyukbo ang gihimo sa relihiyosong sektor dinhi sa Sugbo. - Darrel Carumba (BANAT NEWS)