CEBU, Philippines - Bag-uhay pang nakapiyansa sa Cebu City Jail gipatay susama sa ‘vigilante-style killing’ human banhigi sa duha ka wala mailhing mga lalaking nagmotor pasado alas siete sa gabii sa miaging adlaw sa Quezon Blvd. Unit 2 sitio Bato Carbon Barangay Ermita.
Si Jose Pabillon, 38, molupyo sa sitio Ponce barangay Carreta nakaangkon og duha ka samad pinusilan sa mata ug sa ulo nga nakaingon sa iyang kamatayon.
Sa imbestigasyon sa kapolisan nasayran nga ang biktima naglakaw sa maong lugar dihang usa ka wala mailhing lalaking nagsuot og orange nga t-shirt ang mipusil sa biktima duha ka higayon.
Human sa maong pagpamusil ang maong lalaki mibalik sa kaubang nagpaabot sa motorsiklo ug nagpasirit kini og padagan paingon sa dalan F. Gonzales.
Ang Crime Scene Investigation Unit nakakuha og duha ka kabhang sa kalibre .40 nga gitouhang maoy gigamit sa pagpamusil ug ang release order sa biktima nga giluklok sa iyang hawak.
Matud pa ni Cebu City Police Director Patrocinio Comendador sa pakighinabi sa mga tigbalita nga aduna silay pagdudang nakakita og kaaway sulod sa Cebu City Jail ang biktima ug posibleng nakigsabot ang maong tawo sa mga taga gawas.
Si Cebu City Police Office Homicide Section chief, Vicente Velasquez nagkanayon mopahigayon sila og background checking sa biktima sa dihang naa pa kini sa sulod sa Cebu City Jail.
Kahinumduman nga pipila na ka tuig ang nakalabay kapin sa 180 ka mga ex-convicts, mga tulisan, kawatan ug mangunguot ang gipamatay dinhi sa dakbayan nga gituuhang binuhatan sa mga vigilante.
Si Pabillon nasikop sa kapulisan niadtong Marso 2 karung tuiga tungod sa kasong pagpangawat apan nakapiyansa kini sa miaging adlaw pasado alas onse sa buntag. (Lesley Caminade) (BANAT NEWS)