CEBU, Philippines - Usa ka puya nga walay ulo napalgang naglutaw ilawom sa 1st Mactan Mandaue Bridge sa habig sitio Aroma, barangay Pajo, dakbayan sa Lapulapu, kagahapon sa alas 6 sa buntag.
Si PO3 Candido Baringue, sa homicide section sa kapolisan sa maong dakbayan miingon nga ang maong puya nasigpatan sa usa ka basurero nga nagpuyo sa maong dapit.
Matud pa niya nga dihang ilang gisusi, nasuta nila nga nadugta na ang lawas sa maong puya nga gibanabanang may lima ngadto na sa unom ka bulan.
Wala na hisayri sa kapolisan kun nganong wala nay ulo ang maong puya.
Ila kining gihaw-as ug human sa paghikay sa mga papeles, ila dayon kining gipalubong sa menteryohan sa Gun-ob, Lapulapu, matud pa ni PO3 Baringue.
Sa pagkakaron padayon pang gipanid-an sa kapolisan ang inahan nga naglabay sa dagat sa maong puya aron pahamtangan sa bug-at nga silot. – BANAT NEWS