CEBU, Philippines - Nadakpan sa kapolisan ang usa ka drayber sa traysikad kinsa mipusil patay kang Felix Toledo didto sa Fine Tree Mall sa sitio Looc, barangay Poblacion, dakbayan sa Danao sa miaging adlaw.
Ang nadakpan mao si Michael Seco, 22, ulitawo nga taga Sta Cruz, barangay Cogon II, dakbayan sa Danao.
Samtang ang kauban niya sa maong krimen nga si Christopher Dawe padayon pa karong gipangita sa kapolisan.
Si SPO4 Teofilo Deguilmo sa kapolisan sa maong dakbayan mibutyag sa Banat News nga naglakaw pauli sa ilang balay ang biktima dihang giatangan kini sa mga suspetsado ug gipamusil sa makadaghang higayon.
Gisuwayan pa og hatod ngadto sa Vicente Sotto Memorial Medical Center sa dakbayan sa Sugbo ang biktima apan wala na kini malibre.
Matud pa ni SPO4 Deguilmo nga ang kasong pagpatay batok sa mga suspetsado atua na karon sa korte. (Romeo T. Limpangog) (BANAT NEWS)